مۆنۆلۆگ و جۆرەکانى لە کۆمەڵە چیرۆکى (تەنیایى) شێرزاد حەسەندا

پوختە

مۆنۆلۆگ بە یەکێک لە تەکنیکە گرنگەکانى چیرۆک هەژمار دەکرێت کە لە لایەن چیرۆکنووسانى سەرەتاى سەدەى بیستەوە گرنگيى زۆرى پێدراوە، بەتایبەتى لە بوارى ڕۆمان و چیرۆکەکانى (جیمس جۆیس، ڤێرجینیا وەڵف و مارسیل پڕۆست)دا ئەم تەکنیکەیان بەکارهێناوە، پاشان لە بەشێکى زۆرى چیرۆکى جیهاندا پەناى بۆ براوە و (شێرزاد حەسەن)یش بایەخێکى زۆرى بەم تەکنیکە داوە،  بۆ ئەوەى لایەنى شاراوەى ناو دەروونى کارەکتەرەکانى چیرۆکى پێ ئاشکرا بکرێت. ئێمە لەم توێژینەوەیەدا لە ڕووى تيۆرییەوە باسى ئەم تەکنیکەمان کردووە و دواى ئەوە هەوڵمانداوە لە کۆمەڵە چیرۆکى (تەنیایى) ئەم نووسەرەدا جۆرەکانى شیبکەینەوە بە نموونە بخەینە بەرچاو و لە کۆتاییدا توێژینەوەکە بە چەند ئەنجامێکى گرنگ گەیشتووە، کە دیارترینیان مۆنۆلۆگى ڕاستەوخۆ و ناڕاستەوخۆ لە کۆمەڵە چیرۆکى ناوبراودا هەیە، کەچى خۆدواندن بەکارنەهاتووە.